RITUS BENEDICTIONIS
ET IMPOSITIONIS PALLIORUM
Antequamprocessio incipiat et "Tu es Petrus" cantetur, Archiepiscoporum Metropolitarum, Pallia recipientium, nomina leguntur.
Cum Summus Pontifex ingreditur, schola cantorum cantat:
TU ES PETRUS Mt 6, 18-19
Tu es Petrus, et super hanc petram
aedificabo Ecclesiam meam, et
portas inferi non praevalebunt adversus eam,
et tibi dabo claves regni caelorum.
Diaconi Pallia, ex Sancti Petri Confessione deprompta, ante Summum Pontificem ponunt.
METROPOLITARUM PRESENTATIO
Cardinalis Protodiaconus Metropolitas Summo Pontifici praesentat Pallia recepturos, atque ea absentium nominepostulat.
Beatissime Pater, Reverendissimi Patres Archiepiscopi hic stantes, Sanctitati Vestras et Apostolicae Sedi fide et devotione addictissimi, humiliter postulant ut Pallium de Confessione beati Petri sumptum, significans quidem potestatem qua, in communione cum Ecclesia Romana, Metropolita in propria provincia iure instruitur, a Sanctitate Vestra sibimetipsis tradatur.
Ceteri vero Patres Archiepiscopi ad Metropolitanas Ecclesias nuper promoti, qui Romam petere hac ipsa die nequiverunt, humiliter petunt ut Pallium recipere queant, nomine et vice Sanctitatis Vestrae, a Legato Pontificio in sua quisque Ecclesia Metropolitana.
IURISIURANDI FORMULA
Metropolitae Pallia recepturi, stantes, ante Summum Pontificem, iurisiurandi formulam una simul legunt.
Ego N.,
Archiepiscopus N.,
beato Petro Apostolo,
Sanctae, Apostolicae, Romanae Ecclesiae,
ac tibi, Summo Pontifici,
tuisque legitimis Successoribus
semper fidelis ero et oboediens.
Ita me Deus omnipotens adiuvet.
PALLIORUM BENEDICTIO
Summus Pontifex, sine mitra ac stans, dicit:
Deus, Pastor aeterne animarum,
qui eas ovium nomine designatas
per Iesum Christum Filium tuum,
beato Petro Apostolo, eiusque Successoribus,
boni Pastoris typo regendas commisisti,
per ministerium nostrum
effunde benedictionis X tuae gratiam super haec Pallia
quibus symbolis pastoralis curae
documenta significare voluisti.
Humilitatis nostrae preces benignus excipe,
atque Apostolorum meritis et suffragiis concede,
ut quicumque ea,
te largiente, gestaverit,
intellegat se ovium tuarum Pastorem,
atque in opere exhibeat, quod signatur in nomine.
Tollat iniectum collo suo evangelicum iugum,
sitque ei ita leve ac suave,
ut in via mandatorum tuorum
exemplo et observatione praecurrens,
in loco pascuae tuae perpetuo collocari mereatur.
Per Christum Dominum nostrum.
R/. Amen.
PALLIORUM IMPOSITIO
Ad finem benedictionis oratione adducta, Summus Pontifex considet, mitram et pastorałem recipit, tandem dicit:
Ad omnipotentis Dei gloriam
atque ad laudem beatae Mariae semper Virginis
et beatorum Apostolorum Petri et Pauli,
ad decorem Sedium vobis commissarum,
in signum potestatis metropolitanae,
tradimus vobis Pallium
de Confessione beati Petri sumptum,
ut eo utamini
intra fines provinciae ecclesiasticae vestrae.
Sit vobis hoc Pallium symbolum unitatis
et cum Apostolica Sede communionis tessera;
sit vinculum caritatis
et fortitudinis incitamentum,
ut die adventus et revelationis magni Dei
pastorumque principis Iesu Christi,
cum ovibus vobis creditis
stola potiamini immortalitatis et gloriae.
In nomine Patris, et Filii, et Spiritus Sancti.
R/. Amen.
Exinde Summus Pontifex in umeris singulorum Metropolitarum Pallium imponit et pacis signum permutatur:
Pax tibi.
R/. Amen. Et cum spiritu tuo.
Interea schola cantorum cantat:
EUNTES IN MUNDUM Mc 16, 15
Euntes in mundum universum,
praedicate Evangelium omni creaturae.
Archiepiscopus Secretarius Congregationis pro Episcopis a Summo Pontifice Pallia recipit aliis Metropolitis destinanda.
Sequitur ritus introitus ad Sanctam Missam.
No hay comentarios:
Publicar un comentario